Навукоўцы назвалі чыннікі шчаснага сталення дзіцяці

На што трэба звярнуць увагу бацькам.

Навукоўцы з Вашынгтонскага ўніверсітэта ў Сэнт-Луісе высветлілі, што жыццё ў бяспечным раёне, правільнае харчаванне, пазітыўнае ўзаемадзеянне і стабільны графік сну з'яўляюцца ключавымі элементамі здаровага паводзінскага і кагнітыўнага развіцця дзіцяці. Вынікамі даследавання яны падзяліліся ў часопісе JAMA Pediatrics.

У ходзе даследавання навукоўцы прааналізавалі побыт 232 маці і іх дзяцей цягам першага года жыцця. Даследнікі сабралі звесткі пра харчаванне, вольны час, сон і месцы жыцця ўдзельнікаў. Пасля дасягнення дзецьмі трохгадовага ўзросту навукоўцы прааналізавалі асаблівасці іх сацыяльнага, эмацыйнага і кагнітыўнага развіцця, а таксама правялі магнітна-рэзанансную тамаграфію для сканавання структуры мозгу паддоследных.

Яны выявілі, што нават дзеці, народжаныя ў неспрыяльным становішчы і ва ўмовах нястачы рэсурсаў, могуць нармальна разумова развівацца, калі бацькі імкнуцца забяспечыць ім дастатковае харчаванне, сон і бяспеку, а таксама арганізаваць супольны вольны час і навучанне.

На думку навукоўцаў, гэтыя чыннікі шчаснага сталення могуць здацца відавочнымі. Аднак цягам першага года жыцця кожны з іх забяспечвае фармаванне трывалай асновы для далейшага развіцця дзіцяці і павышае шанцы яго паспяховай інтэграцыі ў грамадства. Верагодней за ўсё, гэта злучана з падатлівасцю дзіцячага мозгу, які развіваецца, да ўспрымання падзей.