У КНДР памёр галоўны прапагандыст сям'і Кім Чэн Ына

Ён ствараў культ асобы кіроўнай дынастыі.

У сераду, 8 траўня, у Паўночнай Карэі памёр Кім Кі Нам - галоўны прапагандыст кіроўнай дынастыі Кімаў.

Пра гэта паведамляе BBC са спасылкай на паўночнакарэйскія дзяржаўныя агенцтвы.

Адзначаецца, што ён памёр праз узрост і «паліарганную дысфункцыю», ад якой лячыўся з 2022 года.

Прапагандыст правёў дзесяцігоддзі, ствараючы культ асобы вакол кіроўнай дынастыі Кімаў.

Сам паўночнакарэйскі дыктатар Кім Чэн Ын наведаў яго пахаванне раніцай 8 траўня і аддаў даніну памяці «ветэрану-рэвалюцыянеру, які заставаўся бязмежна адданым» рэжыму.

Паўднёвакарэйскае інфармацыйнае агенцтва Yonhap параўнала яго з кіраўніком прапаганды нацысцкай Нямеччыны Ёзэфам Гебельсам, шырока вядомым сваёй мантрай «паўтарайце хлусню досыць часта, і яна стане праўдай».

У 1966 годзе яго прызначылі намеснікам дырэктара Дэпартамента прапаганды і агітацыі Пхеньяна, дзе ён шчыльна супрацоўнічаў з Кім Чэн Ірам, папярэднікам і бацькам цяперашняга лідара Кім Чэн Ына.

Пазней Кім Кі Нам узначаліў дэпартамент, адыграўшы вызначальную ролю ў фармаванні мэсэджаў краіны, паколькі ён служыў сямейнай дынастыі, якая стала самай доўгай у свеце.

З паведамленняў, ён меў блізкія стасункі з Кім Чэн Ынам, а некаторыя СМІ нават называлі іх «сабутэльнікамі».

У 1970-х гадах Кім Кі Нам узначаліў дзяржаўны рупар, газету Родонг сінмун.

Ягоны аддзел прапаганды ўтрымліваў кантроль над камунікацыяй і інфармацыйнымі плынямі ў дзяржаве і за яе межамі.

Як піша BBC, адным з прыкладаў таго, як дзейнічала прапагандысцкая машына, стала раптоўная смерць Кім Чэн Іра ў 2011 годзе. Гэта паскорыла ўзыходжанне ягонага сына, Кім Чэн Ына, на пасаду лідара краіны, якому ў той час было ўсяго 20 гадоў.

«Ні адна сіла на зямлі не можа спыніць рэвалюцыйны прагрэс нашай партыі, войска і народа пад мудрым кіраўніцтвам Кім Чэн Ына. Пад кіраўніцтвам Кім Чэн Ына мы павінны ператварыць наш смутак у сілу і мужнасць і пераадолець цяперашнія цяжкасці», - гаварылася ў адным з першых паведамленняў дзяржаўнага агенцтва пасля смерці Кім Чэн Іра.

Ён таксама быў адным з нямногіх паўночнакарэйскіх чыноўнікаў, які наведаў Паўднёвую Карэю — там ён узначаліў дэлегацыю на пахаванні былога прэзідэнта Паўднёвай Карэі Кім Дэ Чжуна ў 2009 годзе.