Расейцы адмаўляюцца ад аўто, набытых у Беларусі

У чым прычына?

Грамадзяне Расеі, якія набылі ў Беларусі аўтамабілі, не могуць паставіць іх на ўлік у мясцовых органах ДІБДР. Прычына ў тым, як мыты выплачваліся пры ўвозе аўтамабіля. Калі была выкарыстаная льгота, то новаму ўладальніку давядзецца даплаціць утылізацыйны збор. Аднак ёсць і іншыя прычыны, пры наяўнасці якіх расейскіх аўтаўладальнікаў чакаюць «сюрпрызы», піша «Автобизнес».

Чытач Дзяніс не так даўно прадаў свой аўтамабіль Mazda 6 2013 года выпуску грамадзяніну Расеі. Аўтамабіль у Беларусі да гэтага змяніў некалькіх гаспадароў, аднак да яго тэхнічнага стану пытанняў у пакупніка не ўзнікла, і была ўкладзеная ўгода, пасля зарэгістраваная ў ДАІ. Гэта значыць, у Беларусі ўсе юрыдычныя працэдуры былі здзейсненыя належным чынам.

- Пакупнік патэлефанаваў мне праз нейкі час і паведаміў, што паставіць аўто на ўлік ён не можа, бо ён павінен заплаціць утылізацыйны збор амаль 1 мільён 200 тысяч расейскіх рублёў (42,7 тысячы беларускіх рублёў - Заўв. рэд.). Адкуль такія завоблачныя сумы ўзяліся, невядома.

Як потым высветлілася, у Расеі кампетэнтныя органы сталі правяраць, па якой мытнай дэкларацыі на тэрыторыю Еўразійскага эканамічнага саюза (ЕАЭС) увозілася аўто. І атрымалася забаўная сітуацыя. Аўтамабілі, якія ўвозяцца ў Беларусь, маглі афармляць па пасажырскай мытнай дэкларацыі (фізічнымі асобамі) або па таварнай мытнай дэкларацыі (юрыдычнымі асобамі). Напрыклад, афіцыйныя дылеры ўвозілі аўтамабілі па таварнай мытнай дэкларацыі з мэтай рэалізацыі іх у Беларусі.

Далей аўтамабіль мяняе ў Беларусі ўласніка (некалькі ўласнікаў) і пасля прадаецца ў Расею. І тут пачынаецца самае цікавае.

Калі высвятляецца, што ў ЕАЭС аўто ўвозілася па таварнай дэкларацыі, то «ўтыль» патрабуюць даплаціць як для камерцыйнага транспарту (статус аўто - тавар ЕАЭС). Але гэта ў некаторых выпадках даражэй за кошт самога аўто. А калі не заплаціш - паставіць аўто на ўлік у ДІБДР не атрымаецца.

Пакупнік майго аўтамабіля не ведае, што рабіць. І я яго разумею, ён не думаў, што сутыкнецца з такой гісторыяй. Мы маем стасункі з ім, спрабуем знайсці выйсце, але яго пакуль няма. Забраць назад гэты аўтамабіль я не магу, бо з атрыманых за яго грошай я ўжо купіў новы. Ды і паводле закона я нічога не парушыў, каб ісці на такое. Навошта мне гэта? Параіў яму звярнуцца ў беларускую ДМК з запытам па аўтамабілі, што ён і зрабіў, - распавёў Дзяніс.

Пакупнік аўтамабіля накіраваў у ДМК ліст з наступнымі пытаннямі:

ці мае транспартны сродак статус тавару ЕАЭС;

па якой мытнай дэкларацыі ў Беларусі выплачаны мыты і ўтылізацыйны збор і ў якой суме.

«Автобизнес» апублікаваў вытрымкі з адказу ДМК:

«Па пытанні аб даце выпуску і статусе паведамляем, што транспартны сродак «МАЗДА 6» выпушчаны мытнымі органамі Рэспублікі Беларусь у адпаведнасці з мытнай працэдурай выпуску для ўнутранага спажывання з выкарыстаннем дэкларацыі на тавары. Гэты транспартны сродак мае статус тавару Еўразійскага эканамічнага саюза.

Дадаткова інфармуем, што на адзіным Інтэрнэт-партале мытных органаў Рэспублікі Беларусь у падраздзеле «База звестак увезенага аўтатранспарту» раздзела «Электронная мытня» рэалізаваная магчымасць пошуку звестак аб выпуску транспартных сродкаў на тэрыторыі Рэспублікі Беларусь паасобна па дзвюх базах звестак:

1) увезеных фізічнымі асобамі для асабістага карыстання і выпушчаных у свабоднае абарачэнне;

2) змешчаных пад мытную працэдуру выпуску для ўнутранага спажывання без абмежаванняў па карыстанні і (або) распараджэнні.

Гэта інфармацыя фармуецца на аснове звестак інфармацыйных рэсурсаў мытных органаў Рэспублікі Беларусь і з'яўляецца афіцыйнай інфармацыяй Дзяржаўнага мытнага камітэта Рэспублікі Беларусь.

У пытанні прадстаўлення звестак аб выплаце мытных аплат і аб нумарах дакументаў, аформленых пры ажыццяўленні мытнымі органамі Рэспублікі Беларусь мытных аперацый па выпуску названага транспартнага сродку, паведамляем наступнае.

У адпаведнасці з артыкулам 356 Мытнага кодэкса Еўразійскага эканамічнага саюза ўсякая інфармацыя, атрыманая мытнымі органамі, выкарыстоўваецца выключна для выканання ўскладзеных на іх задач і функцый. Пры гэтым службовыя асобы мытных органаў не маюць права выдаваць, выкарыстоўваць у асабістых мэтах або перадаваць іншым асобам такую інфармацыю.

Улічваючы сказанае, звесткі аб выплаце мытаў і аб нумарах дакументаў, аформленых пры ажыццяўленні мытных аперацый да названага транспартнага сродку, могуць быць пададзеныя на заяву асобы-дэкларанта або яе законнага прадстаўніка. Прадстаўнікі дэкларанта могуць здзяйсняць дзеянні ў межах прадстаўленых ім паўнамоцтваў.

З улікам вышэйпададзенае, падаць Вам звесткі аб выплаце мыты і аб нумарах дакументаў, аформленых пры здзяйсненні мытных аперацый у дачыненні да названага транспартнага сродку, не ўяўляецца магчымым.

Па пытанні накіравання інфармацыі аб выпуску вышэйназванага транспартнага сродку на адрас арганізацыі, якая выдае электронныя ПТС і знаходзіцца на тэрыторыі Расейскай Федэрацыі, інфармуем, што такія звесткі прадстаўляюцца толькі асобе - уласніку транспартнага сродку або мытнаму органу дзяржавы - члена Еўразійскага эканамічнага саюза на іх запыт».

- Атрымліваецца, - рэзюмуе Дзяніс, - што калі на тэрыторыю ЕАЭС (у тым ліку Беларусі) аўтамабілі першапачаткова ўвозіліся, напрыклад, дылерам, а пры гэтым запаўняюцца таварныя дэкларацыі, то пры наступным продажы аўто ў Расею мясцовыя органы папросяць заплаціць павышаны ўтыль. Сумы могуць быць проста шалёнымі. Людзі трапляюць у тупік, у такім аўтамабілі няма эканамічнага сэнсу ад пакупкі. Гэта звышдорага для ўжыванага аўто.